Projektligji “Për disa shtesa dhe ndryshime në ligjin nr. 7905, datë 21.3.1995, ‘Kodi i Procedurës Penale i Republikës së Shqipërisë’, i ndryshuar”

Projektligji “Për disa shtesa dhe ndryshime në ligjin nr. 7905, datë 21.3.1995, ‘Kodi i Procedurës Penale i Republikës së Shqipërisë’, i ndryshuar” synon forcimin e garancive të procesit të rregullt ligjor në procedimin penal, veçanërisht të drejtave të personit nën hetim, të të pandehurit dhe të dëshmitarit. Nisma vjen si përgjigje ndaj problematikave të konstatuara në praktikë lidhur me respektimin e të drejtave të njeriut, barazinë e armëve dhe transparencën e procesit penal, si dhe ndaj standardeve të vendosura nga Gjykata Kushtetuese, Gjykata e Lartë dhe vendimet e GJEDNJ-së kundër Shqipërisë.

Ky projektligj mbështetet në analiza krahasimore me legjislacionin italian dhe francez, direktivat e BE-së, jurisprudencën e GJEDNJ-së dhe të GJED-së, si dhe në vendimet e Gjykatës Kushtetuese dhe ato unifikuese të Gjykatës së Lartë.

Nisma përbëhet nga 106 nene, prek rreth 90 dispozita të Kodit dhe shton dy krerë të rinj, për provat digjitale dhe mbi hetimet e mbrojtjes si dhe një seksion të ri mbi mjetet e kërkimit të provës me ndikim në lirinë personale. Ndërhyrjet shtrihen në të gjitha fazat e procedimit dhe ndërtohen mbi tetë shtylla kryesore: rishikimin e regjimit të masave të sigurimit personal; barazinë e armëve dhe hetimin e mbrojtjes; garancitë kundër vetëinkriminimit; mbrojtjen e të drejtave themelore gjatë kërkimit të provës; rritjen e standardit për dërgimin e çështjes në gjyq; prezumimin e pafajësisë dhe ndalimin e publikimit; regjimin e pavlefshmërisë dhe papërdorshmërisë; si dhe standardet e gjykimit të drejtë dhe publicitetin e seancës.

Kontributet në kuadër të procesit të konsultimit dhe përmirësimit të përmbajtjes së këtij projektligji, do të përcillen nga subjektet e interesuara nëpërmjet postës elektronike drejtuar Ministrisë së Drejtësisë, me anë të regjistrit elektronik në adresën http://www.konsultimipublik.gov.al, në adresën postare të Ministrisë së Drejtësisë “Bulevardi “Zogu I-rë”, Tiranë”, si dhe në adresën e emailit të Koordinatorit për konsultimin publik: Greis.Como@drejtesia.gov.al.