PVKM PËR MIRATIMIN E NDRYSHIMIT TË STATUSIT DHE TË SIPËRFAQES TË EKOSISTEMIT UJOR/TOKËSOR “RRUSHKULL” NGA “REZERVAT NATYROR I MENAXHUAR” NË “PEIZAZH I MBROJTUR”

R E P U B L I K A  E  S H Q I P Ë R I S Ë

KËSHILLI I MINISTRAVE

VENDIM

PËR

MIRATIMIN E NDRYSHIMIT TË STATUSIT DHE TË SIPËRFAQES TË EKOSISTEMIT UJOR/TOKËSOR “RRUSHKULL”

NGA “REZERVAT NATYROR I MENAXHUAR”

NË “PEIZAZH I MBROJTUR”

Në mbështetje të nenit 100 të Kushtetutës, pikës 2 të nenit 8, të pikës 1 nenit 35 dhe nenit 36 të Ligjit nr. 81/2017 “Për zonat e mbrojtura”, me propozim të ministrit të Turizmit dhe Mjedisit, Këshilli i Ministrave

VENDOSI:

1. Miratimin e ndryshimit të statusit të ekosistemit ujor/tokësor “Rrushkull” nga “Rezervat Natyror i Menaxhuar” (kategoria IV e zonave të mbrojtura) në “Peizazh i Mbrojtur” (kategoria V e zonave të mbrojtura).

2. Miratimin e ndryshimit të sipërfaqes të këtij ekosistemi, nga 650.0 ha, në 579.5 ha, sipas hartës bashkëngjitur në Shtojcën 1 dhe sipas kufirit të paraqitur sipas tabelës së koordinatave në Shtojcën 2, bashkëlidhur dhe që janë pjesë e këtij vendimi.

3. Kjo zonë përfshin sipërfaqe me pyje, bujqësore, heterogjene bujqësore, shkurre, kënetore, inproduktive dhe ujore detare. Mbulesa e tokës brenda sipërfaqes së Peizazhit të Mbrojtur “Rrushkull”, jepet në Tabelën 1 më poshtë:

Tabela 1. Sipërfaqja e PM-së, e përshkruar sipas mbulesës.

4. Peizazhi i Mbrojtur “Rrushkull” ka një nënzonë ruajtjeje e administrimi, si më poshtë vijon:

a) Nënzona e Rekreacionit me sipërfaqe 579.5 (pesëqind e shtatëdhjetë e nëntë presje pesë) ha, e shënuar në hartë me ZR.

Në këtë zonë përfshihen pjesët e habitateve pyjore dhe ujorë. Në të zbatohet shkalla e tretë e mbrojtjes, që siguron një territor me ndikim të ulët dhe kontroll të veprimtarive turistik, si mundësi shëtitje në natyrë, shërbime turistike në mënyrë të tillë që respektojnë funksionet e zonës së mbrojtur, vlerat e tij ekologjike dhe ato të peizazhit natyror, në mbështetje të studimeve urbanistike të miratuar nga KKT-ja.

Zonimi dhe sipërfaqet në Peizazhin e Mbrojtur “Rrushkull” jepen në Tabelën 2.

Tabela 2. Zonimi i brendshëm i PM-së.

5. Aktivitetet shfrytëzuese të burimeve natyrore, të cilat ndodhen brenda territorit të Peizazhit të Mbrojtur dhe që janë pajisur me leje mjedisore dhe/ose vendim të KKT-së deri në datën e hyrjes në fuqi të këtij vendimi, do të lejohet të vazhdojnë ushtrimin e aktivitetit nëse përmbushin kushtet e parashikuara nga Ligji nr. 81/2017 “Për zonat e mbrojtura”.

6. Zonat urbane brenda perimetrit të zonave të mbrojtura, të identifikuara në Vendimin nr. 10, datë 28.12.2020 në Këshillin Kombëtar të Territorit, do të jenë pjesë e Planit të Menaxhimit të zonës së mbrojtur duke u harmonizuar me rregullat e parashikuara nga Planet e Përgjithshme Vendore dhe Planet e Detajuara Urbane të miratuara.

7. Ministria përgjegjëse për zonat e mbrojtura, në bashkëpunim me ministritë e linjës, me bashkitë, me publikun e interesuar, shoqërinë civile dhe me pronarët privatë, pronat e të cilëve shtrihen brenda territorit të zonës së mbrojtur, miraton Planin e Menaxhimit të Peizazhit të Mbrojtur dhe objektivat e ruajtjes së zonës, të hartuar nga specialistët e fushës në bashkëpunim me Agjencinë Kombëtare të Zonave të Mbrojtura brenda dy vitesh, nga data e hyrjes në fuqi të këtij vendimi.

8. Administrata e Zonave të Mbrojtura të Qarkut Durrës kryen funksionet menaxhuese të Peizazhit të Mbrojtur “Rrushkull”.

9. Me hyrjen në fuqi të këtij Vendimi, Urdhri nr. 2, datë 26.12.1995 i Ministrit të Bujqësisë, “Për shpalljen Rezervat Natyror i Menaxhuar, Rrushkull”, shfuqizohet.

10. Ngarkohet Ministria e Turizmit dhe Mjedisit, Agjencia Kombëtare e Zonave të Mbrojtura dhe organet përkatëse të vetqeverisjes vendore, për zbatimin e këtij vendimi.

Ky vendim hyn në fuqi menjëherë dhe botohet në Fletoren Zyrtare.

                                                                                                          KRYEMINISTËR

                          EDI RAMA

SHTOJCA 1

SHTOJCA 2